Page 94 - SicilianaEneide

Speru ca nta sta terra ritruvari
putiti l'agi e lu tranquillu stari

di la pirduta patria ca fu granni.

Li doni rendu cu cavaddi mei
ed a lu vostru regi, ch'é famusu

nto Laziu già, ca figghiu n'arrisutta

di Veniri divina, cunsignati

la biga ca vi dugnu e li cavaddi
pi trasiri regali nta citati,

pirchì la manu di me figghia vogghiu

ad iddu dari comu si cunveni
e già prufetizzaru Apollu e Faunu.

Cuntenti riturnaru nta lu campu

l'araldi cu nuvella ca lu cori
di l'eroi llinchi d'esultanti gioia.

Interventu di Giunoni

Lassamu stari a lu latinu regi,

cuntentu ca lu chiovu si livavu

di truvari maritu pi la figghia
ca Rutulu non fussi di dd'appressu,

lassamu stari Enea ca gongolava

pirchì finivu d'essiri minnicu

ca nautra Didu si truvavu infini,
ch'é virginedda puru, a quantu pari,

e nautru regnu ci havi pi dutanza,

chiù raffermu di dda secunna Tiru,
lassamu stari li trujani tutti

cuntenti ca fineru di vagari,

lassamu stari a Veniri filici

ca lu so figghiu infini s'accasavu
e di Giunu parramu immantinenti.

pag. 103