Page 53 - SicilianaEneide
P. 53
Ittava focu vivu la muntagna
e terra nivura chiuveva a ciumi
du celu divintatu picireca,
mentri a trimari cuminciò la terra.
Capemmu allura c'agghicammu dunni
la vucca aperta Enceladu stinnutu
tineva vumitannu raggia e focu
pirchì lu patri Giovi l'azziccavu
di terra cummigghiata supra d'iddu
pi punizioni di lu so strafari.
Sutta na roccia di graffianti lava
lu riparu truvammu di la notti
e di la fitta cinniri cadenti.
Quannu l'aurora dopu riturnavu,
muti niscemmu di la grutta comu
li surci fannu pi timuri granni
di l'acquartatu jattu ca l'aspetta.
Achemenidi
Cu l'occhiu vivu d'impruvvisu vitti
'n-omu varvutu ch'era Grecu certu
pirchì vistutu comu a chiddi stissi
ca vitti sutta li truiani mura.
Lestu la spada pigghiu, ma lu Grecu
'nginocchiu si prustravu e dissi: -Grecu
sugnu si, ma spirdutu, ca nun fici
in tempu d'acchianari nta la navi
d'Ulissi ca scappava dopu ca l'occhiu
a Polifemu cu na grossa travi
a tradimentu ci cavavu; paci
e pirdunanza, si putiti, dati
a cu vi fu nimicu in guerra, oppuru
pag. 51
