Page 57 - SicilianaEneide
P. 57
Libru quartu
L'amuri di Didoni
Didoni a forza d'ascutari Enea
e ripruvari cosi ca Sicheu
di dari non puteva pirchì mortu,
sempri chiù forti lu disiu pruvava
di stari assemi ad iddu ad ogni istanti.
Li peni ca cuntava, la famusa
diretta discindenza di la Dea,
la viduvanza d'iddu e puru soi,
lu so circari forti patria nova
ca lu distinu la vuleva granni,
lu bisognu c'aveva in viritati
d'aviri accantu 'n-omu di sustanza
pi guvirnari lu nascenti statu
e lu piaciri non indifferenti
ca pruvava cu d'iddu nta lu lettu,
tutti sti cosi ca cunsidirava,
pinseri novu nasciri ci ficiru
di maritarisi cu d'iddu e regi
farlu fissu di la nuvella Tiru.
Lu cunsigghiu a Anna
Ad Anna ni parravu, la suruzza
ca cunsigghera di fiducia aveva,
dicennuci li remori c'aveva:
nun si scurdava di lu primu amuri,
ma st'omu dda arrivatu di luntanu
bruciari la faceva nta lu lettu
e cuntrastu nta l'anima sinteva
pag. 55
