Page 59 - SicilianaEneide
P. 59
l'eroi trujanu e dici ad iddu nettu:
"ubi tu caius es, ibi ego caia."
(Paroli chisti ca ci l'insignavu
Giunoni la putenti prutittrici
di matrimoni e fimmini spusati.)
Li cuturnati scarpi e la curazza
metti da parti Didu e fimminili
abbigliamentu sfurna di la cascia
ca vinni chiusa cu lu catinazzu
quannu ammazzatu fu lu so Sicheu.
Lu tempu passa e crisci l'amurusu
amplessu, ca li vidi sempri assemi
la genti in ogni locu e già l'eroi
di certu ci ripensa a non partiri.
Cca ci havi pani cumpanaggiu e paci!
E poi Didoni é bona, dispunenti,
ricca e famusa e puru innammurata!
Cu sapi si cutantu trova dunni
lu Fatu voli, ca d'Italia parra?
Li navi in portu riparati sunu
e chini d'acqua e cibu in abbundanza,
ma soprassedi la partenza Enea.
La raggia di Iarba
Curri la Fama di stu grandi amuri
nta l'africanu solu e li nimici
di lu nascenti statu sunu allerta,
pirchì si temi già la so putenza
e lu connubiu frigiu in comitanza.
Idda a la corti getula n'arriva
e Jarba avvisa di l'avvenimentu,
figghiu di Giovi c'aspirava forti
pag. 57
