Page 48 - SicilianaEneide

a Palinuru ci affidammu tutti,
ca cu mastranza d'Itaca li scogghi

duppiavu chianu finu ad agghicari

ad Aziu, dunni sorgi la muntagna
Leucate ditta e lu sacrariu a Febu,

lassannu non tuccati li tirreni

di l'isuli di Zanti, Samu e Nuritu.

Scinnemmu a terra e già vulgeva l'annu
di la partenza svinturata e tristi

ca passammu tra terra, mari e peni.

Pinsammu giustu d'onorari ad Aziu
li Dei Penati e la mimoria amara,

a Febu dedicannu lu fistinu

nta dda jurnata china di rimpiantu.
Dopu li gari, cilibrati comu

s'usava fari nta li funerali,

ed onaratu Apollu cu l'offerta
di vinti capri e vinu di la Frigia,

a navigari riturnammu a tappu,

ca c'era scantu di non provocari

li pistifiri strali di lu Diu.
Batti lu remu e la vela n'ammutta

Incontru cu Elenu ed Andromaca

finu ca spunta all'orizzonti terra,

ca Palinuru dissi di Butrintu,

portu d'Epiru ca s'affaccia a mari.
Comu arrivammu cu li nostri navi,

fummu accugliuti cu sgumentu granni

da Elenu, figghiu vivu di lu regi

nostru, ca mortu si crideva a Troia.
Iddu, già vintu di li Greci, supra

pag. 46