Page 44 - SicilianaEneide
P. 44
e patria nova comu si cunveni,
ma d'impruvvisu Apollu l'arcu pigghia
d'argentu e strali sibilannu manna
supra lu campu ca scicannu vannu
e peddi ed ossa di li me cumpagni.
Di curriri ad Ortigia già pinsai
pi sentiri d'Apollu lu responsu
di stu flagellu ca ni manna, quannu
li Dei Penati mi s'apprisintaru
pigghiannu furma d'omini viventi
Parranu i Penati
ca dicunu: - Nun fari strata persa
c'Apollu sta dicennu chiaramenti
ca nun é Creta l'ultimu distinu
ca t'assignò lu Fatu e beddu chiaru
t'imponi di partiri di gran cursa
li navi dirigennu ad occidenti.-
(puru sta vota lu divinu Enea
non dissi tuttu chiddu ca sintivu
di li Penati Dei ca chiaru e tunnu
parrarunu d'Italia, Laziu e Roma,
la vera naca di l'anticu semi
ca 'un era Creta comu dici Anchisi
e ne Cartagu comu Didu spera!)
La timpesta
L'ordini detti di turnari a mari
e quannu Creta fu luntana ormai
ca 'un si videva nenti all'orizzonti,
all'improvvisu a chioviri accumincia
e si scatina in celu na timpesta
pag. 42
