Page 145 - SicilianaEneide
P. 145
comu li spighi sutta di la falci,
ma li trujani sunu scuraggiati,
c'arretranu custanti nta lu campu,
pirchì d'Enea si senti la mancanza.
Cu l'erba santa di li Dei curata
vinni nta nenti d'Enea la firuta
ed iddu cu la biga riturnavu
a curriri nto campu richiamannu
a Turnu lu spergiuru e dari fidi
a lu sanciutu pattu ca rumpivu.
A matula lu cerca nta lu campu,
ca Giuturna lu Rutulu trasporta
cu la biga luntanu di lu troju
ed accussì nto campu du turmenti,
ca spingiunu nta l'Adi tanta genti,
si vidunu distanti ca lu scontru
tra d'iddi non avveni e sunu truci:
l'unu lu 'nsacca la latina schera
pi manu di l'Anchisidi furenti
e l'autru la trujana pi la manu
di Turnu tracutanti e sviculuni.
Attaccu a Laurentu
Dopu tantu girari pi lu campu,
Enea pinsavu d'attaccari Laurentu
e daccussì finissi sta nuvena
di patti sempri stritti ma traduti.
La schera cumpattavu e cu li scali
li mura si proposi d'espugnari
e nun sbagghiavu ca li difinsuri
foru da Turnu già mannati in campu.
pag. 154
