Page 149 - SicilianaEneide

e lu rincurri Enea ma nun l'agghica,

ch'é chiù veloci lu fuggenti rutulu.

Pi cinqu voti gira Turnu attornu
a la citati assicutatu senza

ch'Enea lu po' firiri cu la spada.

'N-asta ci voli ca di luntanu feri!
La cerca lu Trujanu tornu tornu

e chidda svelli con immani sforzu,

ca fu chiantata di lu stissu Marti,
supra 'n-artaru sacru tempu arreri.

Cu forza e slanciu tira lu pisanti

dardu, prigannu Marti di guidarlu.

L'ascuta Marti e Turnu in terra tumma,
firutu nta la jamma. Appena vidi Enea

di supra cu la spada dici:

- Tu vincituri risuttasti infini.
Lavinia pigghia, lu so regnu e tuttu

lu Laziu si t'aggrada, pirchì nuddu

c'é ca poti cuntrastarti. Ti preju

di riporri la spada e fari grazia,
si l'affettu d'Anchisi ti fu caru,

di la me vita pi pietà di Daunu,

c'a mia di campari nun m'importa.
Enea lu vrazzu cala ripunennu

la spada nta lu ciancu ca la grazia

cuncedi a Turnu di la vita chiesta,
ca d'Anchisi lu nomu lu cimmavu.

Ma comu l'occhi cala e vidi in pettu

a Turnu di Pallanti lu balteu,
a la menti ci vinni nautru patri,

ca chiangi senza spemi a Pallanteu.

pag. 158