Page 132 - SicilianaEneide

Sai chi ti dicu? Curri in campu accantu
a stu ladruni c'addifenni tantu,

oppuru resta ddocu, comu voi,

c'a mia lu tempu scurri e nun lu perdu
a diri cosi disinsati. A prestu

risposta dugnu e ti prumettu dopu

ca la to testa in bona cumpagnia

appennu cca davanti a stu palazzu.
Cu l'armi e non a matula parrannu

mi si cunfà risolviri li cosi.

Accussì dici Turnu e fora nesci
lassannu leggiu lu so scannu e curri

a priparari nautru attaccu in campu.

La risposta di Diomedi

Dopu s'apprisintavu a lu cunsessu

l'ambasciaturi Venulu agghicatu
cu la risposta saggia di Diomedi.

Lu grecu fa sapiri ca finivu

la guerra contru la città di Troja
e nun ha sensu cuntinuarla contru

li so figghi custretti ad emigrari.

Iddu non sulu nun duna l'assensu,

ma cunsigghia d'accogliri li troj
in paci e cu rispettu pirchì sannu

comu si fa la guerra, ca deci anni

palestra bona foru di custanti
allenamentu e sunu mastri d'armi.

Lu parlamentu mutu resta e taci

pirchì non poti chiù trattari paci,

ca Turnu già partivu pi l'attaccu.

pag. 141