Page 136 - SicilianaEneide

Morti di Camilla

Ma Giovi Arrunti cerca e lu cunvinci

di non scappari e cuntrullari fermu
lu modu di pugnari di Camilla,

ca ci assignò lu Fatu lu distinu

di fari sicca la ciuciara fera.
Chiangi a stu puntu la divina Trivia

ca vidi di Camilla l'imminenti

fini e vulannu scinni nta lu campu,

pi fari la minnitta già prumissa.
Intantu curri arreri di Cloreu

Camilla ca scippari, dopu mortu,

ci voli la gualdrappa russa e d'oru.
Cavalcari la vidi Arrunti scinta

supra 'n-cavaddu ca pareva ventu,

cu l'arcu tintinnanti nta li manu,
ca di murtali strali era balestra.

Cu l'asta pronta ad azziccarla allura

cu lu cavaddu la rincurri e dici:
- Orsù Camilla forti nta stu chianu,

ca preferisci all'amurusu lettu,

apri la vucca e lingua tira fora

ca di tia vogghiu sentiri l'afflatu
prima ca l'asta mia assitata azziccu

nta lu to corpu virginali e friscu. -

Idda non parra e tracutanti e fera,
alla tagghiata minna cu la manu

la corda porta di l'arcata virga;

ma prima di scuccari di luntanu

dardu murtali, l'azziccanti ferru
d'Arrunti agghica ed arrumazza in terra.

pag. 145