Page 135 - SicilianaEneide
P. 135
comu lu Fatu decretavu già,
ma ca prumissa fici di minnitta
a cu l'avissi accisa nta lu campu.
Di masculi lu ciavuru non senti
e di l'Amuri l'appuntuti dardi
nun percianu lu cori, assortu sulu
a scavaddari e battiri li selvi,
disiusu sulu d'avvinturi forti.
Idda di cursa arrispunnivu a Turnu,
ca ni fici la cummannanti in capu
di li surdati cavalcanti in armi.
Scontru di cavalleria
Frimenti di pugnari, lu squadruni
appronta e fora di li mura a centru
di schiera si disponi cu la spada
in manu risplindenti. - Avanti -, grida,
e lu pinnacchiu supra l'elmu oscilla.
Di contra sta lu troicu squadruni
c'arretra all'appariri di Camilla,
ma lu cumpatta lu richiamu fermu
di l'ottimu Tarconti e contrattacca.
Ripiega la ciuciara e torna arreri
e cu stu modu di fintari sveltu
na stragi ti cumbina tra li Troj:
attaccannu e scappannu e viceversa,
trova lu modu di pirciari panzi,
facci e pitturini, rumpennu scudi
curazzi ed elmi, e già pirdenti pari
l'armata etrusca nta lu campu apertu.
pag. 144
