Page 139 - SicilianaEneide

Libru dodicesimu

Turnu accetta lu duellu

Comu un canuzzu vastuniatu Turnu
varca li porti di Laurentu e mutu

s'assuppa li guardati di la genti,

ca chiaramenti sunu di scuntentu

pi du' battagli persi di sta guerra,
vuluta d'iddu sulu a so vantaggiu.

Capisci ca si perdiri non voli

non sulu guerra ma la facci puru,
ci resta d'accittari di duellari.

Pirtantu a re Latinu s'apprisenta

e dici: - Messi a li Trujani manna,
ca Turnu accetta di duellari in campu

cu lu ladruni tracutanti e furbu,

ca daccussì lu stennu e stamu in paci.-

Tentativu vanu di Latinu

Lu re Latinu, ch'era bunacciuni
ed incapaci di rancori, dici:

- Metti da parti, Turnu, st'odiu vanu.

Lassa ca messi mannu pi sanciri

la paci cu li Toschi e li Trujani.
Chiudemu a Janu li firali porti;

nenti chiù stragi, nenti chiù tenzoni,

nenti chiù morti, ma feconda paci.
Non ti cunveni arrisicari a vita,

ca nenti perdi e re tu sempri resti

pirchì 'un attenta a lu to tronu Enea. -

- Vecchiu balordu, ci arrispunni Turnu,

pag. 148