Page 129 - SicilianaEneide

Libru undicesimu

Scinni la notti, discussioni di tregua

La notti cala e cessa l'ammazzari,

ca nun cunsenti lu vilami scuru
d'aviri chiara cugnizioni in campu.

Trova lu varcu la latina schiera

pi riturnari tra li mura amichi.

Puru l'esercitu troicu-tuscanu
trova rizettu nta l'accampamentu.

Si cuntanu li morti e li firiti

e l'indumani da Laurentu in luttu
arrivanu li messi nta lu campu

ca vonnu tregua pi dunari paci

a chiddi ca mureru cumbattennu.

Capivu Enea ca sunu li latini
tanticchia titubanti ca di certu

nun si pinsava tanta resistenza

e tanta morti. Allura dici: - Tregua
vi dugnu e puru paci si vuliti!

Nudda ragiuni spingi nui Trujani

a fari guerra contru li latini,
D'iddi, sulu lu regi n'havi a dari

cuntu di chiddu ca facivu contru

a la parola data e Turnu puru,
ca m'affinnivu e poi si ni scappavu.

Paci propongu e Turnu sulamenti

invitu in campu a singolar tenzoni

quann'é ca voli e comu chiù ci aggrada,
ch'é troppu vecchiu re Latinu a chistu!

pag. 138