Page 128 - SicilianaEneide

Nun sbagghia Enea ca ci l'azzicca giustu
sutta lu ciancu ed iddu in terra casca,

ma nun lu percia dopu cu la spada,

pirchì lu figghiu accurri e lu difenni.
Resta perplessu Enea pinsannu a Julu

e dici: - Granni é st'amurusu sensu

ca dimostri, o Lausu, ma resta arrassu

di stu to patri, ca cascavu in terra
e nun lu poi salvari di la morti. -

Comu risposta lu picciottu attacca

Enea, ca si difenni e lu fa siccu.
Lu sacrificiu di lu figghiu duna

locu a li Volsgi di purtari in salvu

Mezenziu ch'é firutu. Quannu vidi
purtari nta lu scudu stinnicchiatu

lu figghiu mortu, lu feroci etruscu

ritorna in campu ad affruntari Enea,
sicuru di muriri, ca non poti

campari senza lu so figghiu mortu.

Mori Mezenziu c'addumanna sulu

di ripusari mortu assemi a Lausu,
mentri prosegui la battaglia a mari

cu li Latini c'attaccati sunu

di du' lati, pirchì surteru a massa
di lu recintu campu li trujani

e spingiunu cu forza e novu ciatu.

pag. 137