Page 120 - SicilianaEneide

ed ju nto campu scinnu a favuriri
la futura rumana putistati. -

Comu s'assetta Veniri, Giunoni

adergi cu la facci virdi e dici:
- Cu quali facci parri, tu ca si'

la vera prima causa di sta storia

accuminciata cca! Di quali Fatu

vai cianciannu ca Troia fussi ancora
si tu non pirmittevi di rubari

a Sparta la muggheri di l'Atridi

a lu trujanu Paridi in pritisa?
Cunflittu d'interessu inoltri accucchi,

pirchì si' matri d'Enea naturali.

(Comu viditi puru nta l'Olimpu
esisti lu conflittu d'interessi,

di cui si parra e nun si sapi mai

quali sunu li pisci di pigghiari
e chiddi di lassari puru ddocu!)

Ju in terra scinnu, ca nun s'havi a fari

nautru delittu tipu Sparta a Turnu

ca cu Lavinia storia aveva prima. -
Discurdanzi e decretu di Giovi

In du partiti li Dei si sparteru,
ca c'era cu Afroditi e cu Giunoni

argumintannu sustineva, certu

non pi giustizia, ma pi cunvinienza.
Cunflittu c'era d'interessi é veru,

ma chi ci azzicca si lu Fatu é chiddu?

E chi forsi Giunoni nun aveva

lu dirittu d'aviri lu sustegnu
a lu so Numi? Chistu voli u Fatu?

pag. 129