Page 118 - SicilianaEneide

ca siddu lu palazzu s'arribella
sunu amarizzi duri a digiriri.

Li dei chiamati a dari soluzioni,

si sfoganu parrannu e su' custretti
ad accittari lu cumuni edittu.

Quindi sti cuncistori sunu sempri

sulenni e furmalisti, e li cunsensi

diventanu decreti senz'appellu.
Puteva certu nta stu casu a Giunu

puniri cu la virga si vuleva,

ma nun ci cunvineva ed era megghiu
tinirla sutta scupa e cosi sia!

A frotti s'affuddaru li putenti

divini abitaturi di l'Olimpu
ad occupari l'apparati scanni,

in forma circulari dispunuti.

Accantu a Giovi Veniri s'assetta
e Giunoni di l'autru latu postu

pigghia, ca daccussì l'Onnipotenti

si trova a centru di l'interessati

e tutti po' squadrari cu la vista.
Quannu assittati foru, discurrennu

di futili cusuzzi d'ogni jornu,

arriva Ganimedi cu la brocca
e servi a tutti nettari ed ambrosia.

Finuti di libbari, Giovi batti

li manu a tempu e tutti li prisenti

all'attenzioni invita e dici: - Figghi
divini di lu celu e mei, vinuti

a parlamentu cu sulerzia e prescia,

vi vogghiu diri ca putenti semu

pag. 127