Page 113 - SicilianaEneide

nto sonnu fannu sicchi l'occupanti.
Ad un ad una chiù di deci sunu

li tendi visitati e chiù di trenta

li morti c'ammazzati ci lassaru.
Cuntenti e satisfatti surpassaru

l'accampamentu ca durmeva ancora,

ma d'impruvvisu avanti si truvaru

tricentu cavaleri ca Volcenti
a Turnu li purtava da Laurentu.

L'assicutaru a cerchiu nta lu pratu,

ma nta la magghia c'incappavu sulu
Eurialu, ca si ni scappavu Nisu.

Ma quannu chistu, ch'era salvu già,

d'appressu chiù non vitti lu cumpagnu,
arreri torna e l'arcu tendi contru

li cavaleri ca pressannu stannu

lu mischinu senz'armi nta li manu.
Unu n'ammazza, dui, forsi tri e quannu

Volcenti scorgi ca lu ferru azzicca

nta l'avvilutu amicu, cu la spada

s'allanza contru d'iddu e lu trafiggi.
Mori Volcenti e puru Eurialu mentri

di frecci trapunciutu Nisu cadi.

Amici e frati in vita e nta la morti,
Eurialu e Nisu foru cilibrati

esempiu vivu di fraternu amuri.

Li testi de du' troj in capu a picchi

apprisintati foru u jornu dopu
a li trujani chiusi nta lu campu,

mentri all'attaccu currunu li fanti.

pag. 122