Page 30 - SicilianaEneide
P. 30
li sintinelli ignari di li mura
scannaru comu tanti ciaridduzzi
e poi li porti sbalancaru tutti.
Comu li lupi assatanati e truci
li Greci si tummaru nta li strati
arrubannu, bruciannu ed ammazzannu
nta lu lettu la genti ca durmeva
senza suspettu d'essiri traduta.
Sulu l'equinu simulacru i lignu
orrendamenti s'ergi tra lu fumu
e lu focu ca tutta la citati
ammagghia, mentri disarmata curri
la genti assicutata di li Greci
e li morti s'accucchianu a catasti.
La stragi
La reggia assalta Pirru, lu putenti
figghiu d'Achilli (ch'era statu prima
da Paridi ammazzatu cu na freccia
ca l'azziccavu nto carcagnu giustu!),
e comu fussi Marti senza scampu
supra l'artaru di li dei penati
Politi ammazza prima e poi so patri
ca di difenniri tintava invanu
muggheri, figghi, niputeddi e tronu.
Lordu di sangu ancora e di suduri,
Andromaca 'ncucciò nta li segreti
stanzi c'aveva nicu tra li vrazza
l'unicu figghiu ca ci detti Ettorri
prima c'Achilli l'ammazzassi in campu.
L'infanti inermi l'assassinu acchiappa,
lu scippa di lu pettu di la matri
pag. 28
