Page 11 - SicilianaEneide

putiri e vita di l'antica Troia,
c'ancora stracanacchi inventa novi

contru a me figghiu e li cumpagni soi,

ca persuru la patria e li parenti
e vannu ancora navigannu spersi

senza tuccari lu disiatu lidu,

ca ci assignò lu Fatu pi finali.

Tu stissu prumittisti gloria eterna
a Roma, patria nova di l'eroi,

ca Tu cunsenti di luntanu stari

di lu latinu situ e di la paci.
Antenori di già terra tuccavu

e di Padua li mura forti strui.

Sulu me figghiu pati e jetta sangu,
comu si sulu suppurtari avissi

l'odiu e lu sgarru di 'n-ostili Numi! -

Disegni di lu Fatu

Cu lu surrisu ca lu celu cemma

quannu timpesti e prucillusi negghi
lu ficiru appariri spavintusu,

lu patri Giovi sulla frunti vasa

la figghia ca prigava e poi ci dici:

- Nun ti scantari e sta' serena, figghia,
ca lu distinu di li to prutetti,

cangiari nun lu poti me muggheri

e mancu la putenza di mia stissu.
Enea sbarcari devi certamenti

unni ricevi u mari u biunnu ciumi,

ca Teviri è chiamatu, e cummattennu

furiusamenti contru lu re Turnu,
Camilla ed autra genti doccu 'ntisa,

pag. 9