Page 14 - SicilianaEneide

e puru la rigina si pripara
a dimustrari gioventuti e sfarzu;

l'occhi s'attrucca, la facci e lu mussu,

supra la testa la curuna metti,
e d'oru addubba la mudesta reggia

pirchì s'aspetta la vinuta certa

di lu figghiu di Veniri divina,

comu Mercuriu cu cirtizza dissi.
Alla reggia difatti s'apprisenta,

e lu precedi, comu si cunveni

a cu' porta di re (puru si vintu!)
e nomu e fama, l'araldu in campu,

ca d'iddu parra, di li so cumpagni,

di lu distinu avversu e di lu mari
ca ci affunnò li navi ed addumanna

ca d'ospiti lu tratti e non nimicu.

Supra lu tronu assisa lu ricevi
ca pari na santuzza di ddi tempi

ed idda dopu ch'Enea s'inchinavu

facennu riverenza appariscenti,

la manu 'nnaniddata stenni e parra.
Tra d'iddi intantu Veniri s'apposta

ca nuvula l'ammuccia tutta para

assemi a lu fratastru di l'eroi,
armatu d'arcu e frecci sapurusi.

Beddu ca stenni l'artu la rigina,

d'Amuri scappa 'n-assurtatu strali

c'azziccavu nto pettu la mischina.
Lu cori di Didoni subbalzavu

Enea guardanu, ca lu circundava

na luci arcana di la matri stisa.

pag. 12