Page 16 - SicilianaEneide

Idda ci ammustra cu paroli e sguardi
ca nicchi-nacchi già lu cori faci;

apri la vucca e parra duci duci:

- Figghiu di Veniri, cu' sapi chiddu
ca tu patisti cumbattennu invanu

contru li Greci ca la Fama cunta,

non poti certamenti dinigari

chiddu ca lu to servu m'addumanna.
Anzi cuntenta sugnu ca lu Fatu

sbarcari cca ti fici cu li navi,

pirchì mi detti l'opportuna sorti
di canuscenza fari e d'aiutari

l'eroi chiù granni di l'antica Troia.

Cca fermati cu mia cu li to navi,
li to cumpagni e li Penati Dei

ca vinti foru e certu vincituri

cu mia sarannu contru li nimici
di sta citati ca mi fu cuncessu

di farla tantu granni quantu fussi

na nica peddi di scannatu voi

e divintò pi mia chiù granni inveci.
La to putenza, ch'é divina, 'nsemi

a la me menti svigghia e risoluta,

la basi sunu di futuru lustru
ca tu circannu vai pi riscattari

d'Assaracu l'onuri e li so figghi.

Sutta lu mantu di Giunoni matri

di Tiru e Troia na citati sula
ni facemu ca purtintusa crisci

e ca lu munnu avvinci senza fini.-

A sti paroli 'ncuraggianti e chiari,

pag. 14