Page 20 - SicilianaEneide

Libru secunnu

Lu cuntu d'Enea

Suddisfattu ca vinni lu disiu,

Didoni tostu, comu passatempu,
tra na manciata e nautra, ed aspittannu

ch'Enea s'arripusassi tanticchedda

di li fatichi novi di lu lettu

e puru pi scopriri nuvitati
supra dd'eventu storicu ca fui

la guerra di l'Atridi contru Troia,

- Parra, ci dissi, o figghiu di la Dea,
di li svinturi ca patisti in guerra

e dopu ca bruciata vinni Troia,

pirchì parrari di lu tempu jutu

paci ti duna e forza di campari. -
Enea ca Dido accuntitari voli

non sulu nta lu lettu ma d'acchitu

nta tuttu chiddu ca sapiri voli,
accuminciò a parrari cu sulerzia:

Difficultà di lingua

- Regina mea quod repetere noctem

mihi queris quae fuit...- Ma si firmavu

pirchì cu l'occhiu di traversu misu
ci parsi ca Didoni nun capeva

apertamenti lu troicu-rumanu.

Allura a Veniri ci dici: - Mater,
ut ista quae siculo more loquitur

posset mea verba accipere, filio

tuo donare oportet alteram linguam. -

pag. 18