Page 41 - Lu stranu viaggiu

D'arreri a lu casteddu surpassatu La mustra di
nu spaziu vastu si stinneva riccu l'invinzioni futuri
di cosi novi,strani e scumpagnati
ca la ragiuni nun li cumprinneva:
palazzi a zighi-zaghi e strati in celu,
navi cu l'ali a forma di matita,
roti rutanti trapuntati i luci,
quadri giganti tutti impastizzati,
tuppetturi squadrati e lungarini,

turri vulanti, scatuli di ferru,
coppi di luci e razzi cumbinati,
palluni a forma di buttighi e tappi
e tanti cosi strani ca 'un capeva.
E vitti puru 'n’omu ca vulava
comu 'n’aceddu ed angilu nun era
cu l'ali nta li pedi e nta li manu,
'n’autru ca genti nova fabbricava
cu pezzi di ricambiu d'autra genti
ed unu ca scriveva comu nenti
nta l'etiri paroli ditti a vuci.

- Tu stai vidennu, dissimi Platuni,
na parti di lu munnu ancora novu,
ca nun l'hai vistu ancora supra a terra.
L'omu, ca nesci i fora di cca dintra,
di tantu in tantu s'arricorda vagu
di chiddu ca cca dintra esisti e visti
e lu rivela supra a terra a tappu
e nasci allura l'invinturi in terra.
Chiddu ca nun quadra veramenti é 'n fattu:

ca cca ci sunu sulu cosi boni,
strutti pi fari beni sulamenti,
mentri li stissi cosi supra a terra
fannu viniri a volti lu scuncertu
ca scupiazzati malamenti sunu
e dannu fannu sulu in tutti i gnuni.
Lassamu stari esempi pi favuri,
pirchì 'un abbasta 'n seculu di vita
pi fari elenchi annutazioni e cunti.
Ma di stu fattu n’havi la culpanza
ddu gran fitusu ca vidisti prima

pag. 38