Page 40 - Lu stranu viaggiu

perchì ha sapiri ca li puliticanti
cca venunu a tummari tutti pari,
prima di fari giri e contragiri.
Tracodda ssu purtuni e ti n'adduni
ca chiù di tri migghiari ammunziddati
ni vidi comu angiovi in salamoria
e t'assicuru ca n'aspettu ancora.
Di chiddi ca canusci, lu Sgamirru,
Scarpuzza Leggia e puru Ciaffagghiuni

aspettu d'acchiappari nto me covu.
Puru a Cuncettu mi l'agghiancu e tegnu
chiù di mill'anni e passa quann'arriva. -
- Platuni, dissi, chi ci dicu a chistu?
'Un é megghiu ca sfilamu a muta a muta,
ca nun mi veni bonu mancu u versu?
Oppuru é megghiu ca trasemu ddocu.
- Nun ascutari mai la tentazioni!
Tiramu drittu comu nenti fussi,
dissi Platuni cu lu mussu strittu.
Puru s'é veru ca nta ssa prigiuni

ci sunu tutti ssi tipastri o quasi,
d'ogni partitu e d'ogni razza e tempu,
accussì parra lu Dimoniu tintu
p'accanzari pritisi d'impurtanza.
Ricordati ch'é veru sulamenti
chiddu ca dici lu Signuri Diu
e ca li labbra d'iddu sunu sulu
lu Santu Verbu e la Natura stissa,
ca d'iddu vinni fatta in viritati.

Leggi li stiddi, u suli,a terra l'acqua,
ascuta li paroli de Prufeti,
nun sentiri la vuci di ss'armali! -
Sintennu stu parrari tantu chiaru,
a lu Dimoniu ca s'arritirava
li corna ci ammustravu cu li manu,
comu fici na vota 'n Prisidenti,
ca ssu purtuni passa prima o poi,
e senza mancu diri na parola
tirammu avanti cu superbia immensa.

pag. 37