Page 35 - Lu stranu viaggiu

li stiddi, u suli, a luna impiccicati
e fissi nta lu celu cu 'n ciusciuni,
li terri ca cumparunu du mari,
lu munnu ca si popula d'incantu
d'aceddi, pisci ed animali tutti,
l'omu di crita fattu comu Diu
lu voli e la cumpagna nata d'iddu
e l'arvulu impidutu e lu scursuni
e l'omu pinitenti e pirchì mori

e l'omu tali a Diu ma nun é nenti,
lu tentativu d'eguagliari a Diu,
la punizioni e la spiranza persa
di na vita, ca c'era, senza morti!
Ascutu, cridu, ma cunvintu sugnu
c'hannu sti fatti ignoti fini e scopi,
ca foru scritti ripurtannu a galla
pinsati di li tempi antichi a scopu
di dari insignamenti di murali.
Pirtantu, pensu ca li scrissi Diu,
ma senza l'intenzioni di parrari

di comu vinni fattu in veru u munnu.
Ju nun lu vidu u Patreternu fari
pupi di fangu e ciusciari valenti
a dritta e manca comu fussi pazzu
e mancu svulazzari comu aceddu!
E cu ci cridi poi a lu stranu fattu
c'a fimmina fu fatta di na costa
di l'omu addumisciutu in Paradisu?
'Un é forsi veru u fattu c'a sturiella

vuleva inveci affirmazioni dari
da putistà di l'omu supra a donna?
E l'accuppiata stramma di scursuni
e fimmina pi fari dannu all'omu,
nun vi pari sanciri la cridenza
di l'arti fimminili ca subissa
l'omu, lu perdi e lu sutterra persu?
Dici beni la Bibbia ch'é Criaturi
d'ogni cosa Diu, ma li fatti ditti
sunu sulu manera di cuntari
cosi adatti a la genti di lu munnu.

pag. 32