Page 24 - Lu stranu viaggiu

La forza ca l'avvinci 'nsemi é tali,
ca scinniri non ponnu in terra mai.
Eterni sunu tra l'eterni sferi,
eternu resta lu so stari in celu
finu a quannu lu Patreternu voli. -

All'orizzonti vitti 'n cicialivu L'opira di Wighland
ch'enormi ed autu in celu si livava
nto menzu di na chiazza circulari.

Man manu ca lu passu s'allungava,
chiù grossu e longu addivintava sempri
ddu cosu longu stinnicchiatu in celu
e nta la chiazza si videva 'nfuta
na fudda janca impiccicata in terra
di simulacri tutti pari nudi.
Nto stissu cicialivu si videva
'n’cesellu fittu d'omini diversi
d'etati e sessu impiccicati attornu
e ‘nta la cima suvrastanti a morti.
Videva picciriddi nichi nichi,

fimmini beddi cu la panza grossa,
vicchiazzi brutti e ripugnanti in corpu
e schelitri di genti misi in mostra,
tutti sculpiti ‘nta la petra janca.
Lu fattu mi pareva 'n pocu stranu
e già pinsava a na dumanna nova,
quannu Platuni dissi giustu in tempu:
- Chista ca vidi sparpagnata in celu
minchia di pupu scuppulata i supra

e tutta arraccamata tornu tornu
cu lu scarpeddu di 'n’artista granni
nto marmuru azziccatu scientementi,
é lu significatu di la vita.
Lu Patreternu cu 'n ciusciuni sulu
fici sta chiazza e tuttu quantu vidi.
Ddocu scrissi li liggi naturali
di l'omu comu nasci crisci e mori
e comu cu l'amuri si rinnova.
Li stissi cosi ca tu vidi cca
supra la terra fici tempu arreri

pag. 21