Page 20 - Lu stranu viaggiu

Propriu d'accantu vitti a Primu Levi
ca camminava mutu e pinsirusu,
'n pocu chiù avanti c'era Claudiu Villa
e poi Guttusu e dui carabineri.
- Su' morti frischi, mi privinni in prima
Platuni ca capivu u me pinseri.
Chisti di giri n'hannu a fari tanti
prima di divintari giusti e santi! -
- O prufissuri di l'ultraterrenu,

ci dissi tostu, comu poi sapiri
lu futuru di st'animi pirduti?
Forsi ca fusti tu puru Cassandra? -
Platuni calmu m'arrispusi e dissi:
- Puru si gran prufeta di lu munnu,
e comu é struttu in veru lu 'nsirtai,
non fui mavaru e mancu chiromanti.
Accussì vosi Putistà Divina.
Ora canusciu lu futuru sulu
pirchì di santu lu putiri n'haiu.
Propriu pi chistu sugnu in gradu puru

di diri lu distinu di cu vivi
o di cca passa sulu pi tanticchia.
Ju francu leggiu senza cuntinenza
nto stissu libru di l'Onnipotenti,
unni nun ci havi sensu lu distingu
du tempu in fasi di diversu tipu.
Pi Diu 'un esisti u Prima e mancu u Dopu,
ma l'Eternu Prisenti ca l'incucchia.-
- Beddu stu fattu, riplicai cuntentu,

pirchì, si t'addumannu, tu mi dici
cosi pi mia futuri supra chiddi
ca mi interessa di sapiri certu! -
- Si! Ma arrancamu tostu pirchì l'Eternu
tri jorna ti cuncessi nta stu postu
e 'un po' sapiri tuttu quantu speri
si ti cunnuci in cosi troppu vani.
La notti ca passasti in santa paci
già fici tracuddari u primu jornu.
Si di piaciri avisti lu cuntentu,
di tempu ni pirdisti troppu assai

pag. 17