Page 19 - Lu stranu viaggiu

e dopu piscaturi e infini Santu.
Perciò nun t'aspittari di truvari
cca dintra mostri turmintusi e cosi
di cui parravu Danti nto so libru,
ma sulu santi e genti cara a Diu.
Li cosi tinti sunu sulu in terra
e nun li trovi certu tra li morti.
Cu mori e nun é santu fa lu giru,
guarda l'Eterna Lampa e poi si jetta

nta lu gibbiuni e nesci fora nudu
cu menti nova e janca e passa a porta
pi riturnari vivu in corpu novu.
Ju stissu fici tanti voti u giru
finu a quannu Platuni addivintai
e parrannu pi vucca du Signuri
svilai ch'esisti 'n munnu supraffinu,
unni regna l'Eterna Perfezioni.
- Stu to parrari chiaru, dissi tostu,
la menti mi grapivu finalmenti!
Platuni pi favuri 'un mi lassari

mentri m'appoggiu a lu bastuni in ciuri
ca tegnu nta la manu e dimmi tuttu
chiddu ca 'un sacciu e menti 'un sapi ancora.-
- Cammina ca 'un ti lassu, m'arrispunni,
seguimi passu passu ca non sbagghi
e cosi ti rivelu sempri novi
e, siddu nun t'affrunti da gnuranza
e m'addumanni chiddu ca 'un capisci,
ti dugnu spiegazioni d'ogni cosa.-

Siccomu dui canuzzi appena nati
appressu a matri vannu ca li guida
o ciaridduzzi saltillanti arreri
a pecura lanuta ca l'addatta,
accussì pedi rummuliannu lesti,
la me cumpagna ed iu cu tuttu u cori
appressu di Platuni ni mittemmu,
ma l'occhiu a destra e manca scurazzava
pirchì disiu la menti n'attanagghia
d'aviri canuscenza di ddu postu
e di la genti ca passava attornu.

pag. 16