Page 65 - SicilianaEneide

lettu, ricchizzi, sintimenti e corpu,
mi lassi comu ad idda strati strati

e nun ti curi e mancu t'interessa

di cu mi pigghia dopu ca tu parti!
A stu pinsari tracutanza aggiungi

di dirimi buttana nta la facci,

dopu c'onuri e cori m'arrubasti!

Curri, vattinni cu li navi versu
li terri ca lu Fatu voli!

Speru ca di Nettunu lu marusu amplessu

t'agghichi e ti suverchi nta la grutta
chiù funna di lu mari e Teti truci

t'addevi comu cani a la catina

e docu invanu invochi lu me nomu.
D'accussì dici e lassa lu trujanu

a meditari supra sta parrata

e poi chiangennu nta la reggia curri.
Didoni ci riprova

Anna la trova nta lu lettu stisa
e la cunsola comu poti. Allura

Didoni pensa di tintari ancora

la ripartenza di li navi frigi.

Sta vota cu la forza e cu l'ingannu!
Ci dici ad Anna di truvari Enea

e dirici di stari ancora 'n-jornu,

megghiu si quattru, prima di partiri
p'aviri lu ricordu chinu d'iddu,

ca chistu sulu la rigina voli.

Didoni, ca lu voli beni, chiangi

e lu pirdunu cerca sulamenti
di li cusazzi ca ci dissi antura.

pag. 63