Page 105 - SicilianaEneide

supra la riva di lu ciumi Tebru.
Lu scurriri di l'acqua duci, duci

e l'ummiri paciusi da campagna

nto munnu lu purtaru novu e beddu
di fauni e ninfi mai viduti prima.

Tra d'iddi appari cu la cruna in testa

Tebru lu Diu dill'acqui murmuranti

e parra persuadenti d'autri genti
c'a munti stannu e sunu pronti a dari

ad iddu lu sustegnu di la guerra.

D'Evandru grecu ed arcadi, cumpagnu
d'Anchisi patri, havi a circari versu

li virdi munti dunni nasci Tebru.

Di bon matinu l'arrusbigghia l'ecu
di canti pasturali assai luntani

a cunfirmari la sunnata vuci.

Enea a la ricerca d'alleati

Appronta allura dui di li so navi

ed iddu stissu la currenti sali
versu l'internu finu a quannu arriva

a li mudesti casi di l'Arcadi,

nta la lucalità di Pallanteu.

Li navi arrivanu precisu mentri
Evandru regi sta sacrificannu

supra l'artaru di Saturnu. Enea

lu ritu non disturba ed alla fini
si presenta dicennu: - Sugnu Enea

trujanu ca sbarcavu nta lu Laziu

cu la bannera janca di la paci,

ma li Latini m'assartaru a frotti.
Tu, ca di Turnu temi li surprusi,

pag. 114