Page 100 - SicilianaEneide

e la rimanna muta muta dunni
vinni, prima ca Giovi la marredda

sbrogghi, capennu quali fu lu capu.

Allettu nta l'infernu si ni torna
allirtannu l'Erinni e l'Acheronti

pirchì la guerra é scatinata ormai.

Scoppia la guerra

Veni ignoratu l'infingardu regi,

ca stava cunsignannu a ddi bastardi,

vinuti dallu terzu munnu, l'onuri
e l'opulenza di lu Laziu anticu.

Lu populu in fermentu lu canceddu

grapi di Gianu, dichiarannu guerra
accuminciata nta lu Laziu invasu

da li pirati turchi e senza terra.

Ausonia tutta s'arrusbigghia ed ardi
e curri all'armi ch'eranu banditi,

pirchì da sempri e puru dopu, quannu

la trumma sona e lu perigliu incalza,
curri la genti a la difisa pronta.

Osci, Sabini, Fescennini ed Equi,

Aurunci, Prenestini ed Euretani

e l'autri genti di li setti colli
e chiddi Teverini e du Volturnu,

già sunu pronti a guerreggiari assemi

contru l'osti nimica ed invasura.
Lu cummannanti in capu di sta genti

é Turnu regi e dopu c'é Camilla,

Mezenziu e Lausu ed Ebalu ed ancora

chiddi ca di poi a Roma divintaru
capi famigghi illustri, imparintati

pag. 109