Page 76 - SicilianaEneide

offerta a l'infirnali riggituri
e li tri rosi d'oru ritruvati.

Idda lu porta nta nu postu orrendu,

unni la terra trema e 'nsurfarata
l'aria putisci scatasciannu fora

di lu tirrenu spurtusatu a tratti.

- Cca veni abbasciu. - dissi e nu purtusu

orrendu e granni chinu di fumusa
negghia mustra all'eroi ca ci trasivu.

Scinnennu nta la terra ddu purtusu,

ca 'n-antru lungarinu ci pareva,
aveva nta li mura stampigghiati

li mostri di li mali naturali.

C'eranu tutti: la miseria, a morti,
u sonnu, la discordia, lu duluri,

a fami, li malanni, l'affannusa

spiranza ca 'un agghica e nta lu funnu
si videva di fogghi spogghiu 'n-olmu

d'orrendu aspettu c'appinnuti aveva

i vani sogni di l'umanitati.

D'appressu si videvanu ragghianti
l'omu triformi, la chimera, l'idra,

l'omu cavaddu, li gorgoni, scilli,

e l' autri mostri di lu mitu anticu.
Enea si scanta e tira fora a spada

ca difenniri voli a so pirsuna

di ddi mostri ca parunu tuccarlu,

ma la Sibilla lu cunvinci tostu
ca l'armi sunu vani contru chisti,

ca sunu sulu d'ummira faciuti

ma facilmenti vinciunu nto munnu.

pag. 85