Page 4 - SicilianaEneide
P. 4
ca s'affacciava a mari ed era misa
di sintinella ddocu di li navi
davanti a Roma ca nascivu dopu,
Cartagini chiamata e ch'era amata
chiù d'ogni cosa da Giunoni santa,
ca crisciri la fici ricca e forti.
Era di casa la divina matri
nta sta citati ca la rispittava
chiù di lu stissu sempiternu Giovi,
ondi per cui spirava e disignava
ca divintassi chista nto futuru
lu centru di putiri di lu munnu.
Puru si nenti si sapeva ancora
di Roma e di la so putenza e vantu,
siccomu puru li divinitati
cridenti sunu e curtigghiari veri
di favulusi fatti ca la genti
dici e la Fama svulazzannu accrisci,
Giunoni 'ntisi ca la so citati
l'avissiru distrutta nto futuru
li discendenti di la troica stirpi.
Idda ca già l'aveva contru Troia
pi ddu famusu fattu di lu pumu
ca Paridi assignavu a cu sapemu,
sintennu diri sta manfrina amara
lu suspittusu dubbiu ci nascivu
ca li figghi de figghi di st'Enea
putissiru in futuru dari locu
a sta divinazioni di lu Fatu.
Pi chistu accuminciavu a dari 'mmestu
a chiddi di li Lici ca scapparu
pag. 2
