Page 3 - SicilianaEneide
P. 3
Libru primu
Primissa
D'Enea vi cuntu la sturiella antica,
di dd'omu forti, svinturatu e granni,
ca terri e mari surpassannu vinni
dda, dunni Roma ci nascivu dopu,
lassannu, assicutatu di malanni,
la terra turca e la città di Troia.
Tu, Musa, c'a Virgiliu dasti ciatu,
a mia sustegnu duna di cantari,
siccomu nenti fussi in sicilianu,
li peni ca passavu st'omu piu
pi mettiri radici nta st'Italia
(ca pari fussi la so Patria antica!)
contru la vuluntati di Giunoni,
non sulu matri santa di lu celu,
ma casciolu di raggia mai cimmata
e puru di rancori, chiù di quantu
lu stissu Giovi poti ch'é suvranu.
Lu pirchì dimmi o Musa e lu pircomu
di st'odiu granni di la matri santa
contru a chist'omu ca scappannu jeva,
ca nun lu miritava certamenti
pirchì rispettu aveva ed osservanza
di li liggi di Giovi e di lu Fatu.
L'ira di Giunoni
C'era na vota na citati antica,
ch'era culonia di la stissa Tiro,
supra la terra libica assittata,
pag. 1
