Page 8 - Lu stranu viaggiu

Nun ti scantari! L'angilu mi dissi
ca nesciri putemu d'autra banna.
Ju stissa 'un’avia vogghia di viniri,
ma siccomu mi prumisi cosi beddi,
cca sugnu pronta pi t'accumpagnari.
Lu pedi si firmavu e l'occhiu fissu
nto fumu la circavu e quannu tutta
la vitti incudduriata nto linzolu
la canuscivu e menti s'acquitavu.

- O duci, dissi, pupa du me cori,
Tu cca pi mia vinisti e chiù 'un arretru.
Fatti vasari mentri camminamu.
Cu tia d'accantu l'Infernu é Paradisu! -
- Nun mi vasari, m'arrispunnivu tostu,
dammi la manu e camminamu lesti,
guardamu assemi stu misteriu prima
e dopu amuri ni sarà chiù duci.-
Manu manuzza dintra lu pirtusu
muti trasemmu e supra nui la terra
arcu si fici ed attuppò la vista.

Voi ca lu scuru m'incitavu, voi San Petru
ca 'n pocu i friscu si sinteva e vogghia
di sentiri caluri mi pigghiavu,
mi l'abbrazzavu tutta e già la menti
in lubrici pinseri si pirdeva,
quannu na gran cuzzata m'arrivavu
ca mi fici furriari tunnu tunnu.
Nun ti vidu a San Petru cu la varva

ca scoppuli mi pigghia e mi rampugna?!
- O Petru Santu, dissi, nta l'infernu
cu ti ci porta? Tu, tri voti santu,
tra l'animi dannati non pò stari -
- Tu non capisci nenti!, m'arrispusi,
Sta minchiata du 'nfernu, paradisu
e purgatoriu 'un havi nuddu sensu.
Unu sulu é lu regnu di li vivi
ed unu puru chiddu di li morti,
ca mancu morti sunu veramenti.
Ju sugnu Petru, chiddu di li chiavi,

pag. 5